अभिनेत्री बिपाशा बासू हिने तिचे लेटेस्ट फोटोशूट चाहत्यांसह शेअर केले आहे. या फोटोमध्ये ती नवरा आणि अभिनेता करण सिंग ग्रोव्हर सोबत असून बिपाशाचा हॉट अंदाज या फोटोत दिसतोय.
बॉलिवूडच्या आवडत्या कपल्सपैकी एक असणाऱ्या बिपाशा बासू आणि करण सिंग ग्रोव्हर यांच्या घरी लवकरच नव्या पाहुण्याचे आगमन होणार आहे. त्यांनी नवीन बोल्ड फोटोशूट शेअर करत ही आनंदाची बातमी शेअर केली आहे. लग्नानंतर ६ वर्षांनी या जोडप्याने आई-वडील होण्याचा निर्णय घेतला आहे.
बिपाशा बासू वयाच्या ४३ व्या वर्षी आई होणार असून प्रेग्नन्सीमध्येही तिचा बोल्ड अंदाज पाहायला मिळतो आहे. काही दिवसांपूर्वी बिपाशा आई होणार असल्याचे वृत्त समोर आले होते. आता तिने फोटो पोस्ट करत याविषयी अधिकृत माहिती दिली आहे. बिपाशाच्या बोल्ड फोटोंसह तिने या फोटोंना दिलेले कॅप्शन लक्ष वेधून घेणारे आहे.
बिपाशा आणि करण यांनी सोशल मीडियावर काही फोटो शेअर केले आहेत. ज्यात बिपाशा हॉट अंदाजात पोज देताना दिसते आहे. केवळ पांढऱ्या रंगाचा शर्ट परिधान करत तिने हे फोटोशूट केले आहे. या जोडप्याचे पांढऱ्या रंगाच्या शर्टमधील हे फोटोज सोशल मीडियावर व्हायरल होत आहेत. चाहते देखील यावर कमेंट्स करत त्यांचे अभिनंदन करत आहेत.
ही पोस्ट शेअर करताना करण आणि बिपाशाने असं म्हटलं आहे की, ‘ एक नवीन वेळ, एक नवीन टप्पा आणि एक नवीन प्रकाशझोत आमच्या जीवनाच्या प्रिझममध्ये आणखी एक अनोखी छटा जोडतो आहे. आम्हाला पूर्वीपेक्षा काहीसे अधिक परिपूर्ण बनवत आहे. आम्ही आयुष्याची सुरुवात वैयक्तिकरित्या केली आणि नंतर आम्ही एकमेकांना भेटलो आणि तेव्हापासून आम्ही दोघे होतो. केवळ दोघांसाठी एवढे प्रेम आम्हाला काहीसं अयोग्य वाटलं. आता लवकरच आम्ही दोनाचे तीन होऊ.’
अभिनेत्रीने तिच्या गरोदरपणाची बातमी देताना पुढे म्हटले आहे की, ‘आमच्या प्रेमाची निर्मिती, आमचं बाळ लवकरच आमच्यात सामील होऊन आमचा आनंद वाढवणार आहे. तुमच्या बिनशर्त प्रेमाबद्दल, तुमच्या प्रार्थना आणि शुभेच्छांबद्दल मनापासून आभार, या गोष्टी आहेत तशाच आमचा एक भाग असतील. बाळा, आमच्या जीवनाचा एक भाग बनल्याबद्दल आणि आमच्याबरोबर एक सुंदर जीवन निर्माण केल्याबद्दल धन्यवाद’.
करण आणि बिपाशा अलोन सिनेमाच्या शूटिंगदरम्यान २०१५ मध्ये एकमेकांना भेटले होते, त्यांनी २०१६ मध्ये लग्न केलं. बिपाशाचं हे पहिलं लग्न आहे, तर करणचं हे तिसरं लग्न आहे. करणने २ डिसेंबर २००८ मध्ये पहिलं लग्न श्रद्धा निगमशी केलं होतं, मात्र अवघ्या १० महिन्यांतच हे नातं संपुष्टात आलं. यानंतर करण पुन्हा एकदा प्रेमात पडला. त्याने अभिनेत्री जेनिफर विंगेटशी लग्न केलं. ९ एप्रिल २०१२ रोजी करणने जेनिफरशी लग्न केलं, परंतु करणचं हे लग्न फार काळ टिकू शकलं नाही आणि २०१४ मध्ये दोघंही वेगळे झाले.
